Wat is die lewe?
Die lewe is 'n holle dol gejaag
'n Boepens onversadigbare maag
Die slegte word verslind
Is vir die goeie blind
Verorber al wat daar voorkom
En kraak die keur van kuisheid krom
'n Vieslik fuik
En bollend buik
Waarin die mens is vasgevang
In vis se ingewande bang.
Die lewe bly 'n sinnelose vlug
Om weg te kom van die besoedeld lug
Wat elke adem trek
So nikotien bevlek
Die rookmis en die petroldamp
Jou sin en ingewande kramp
'n Siese reuk
Jou neus laat kreuk
'n Naarheid in die maag opstu
'n Drang die drek dan uit te spu.
Die lewe word 'n onvervulde stryd
Om by te hou die aangejaagde tyd
Wat heel die dag bepaal
Jy goed uitkom of kaal
Van vroeg tot laat die ure tel
Die lewe skik na tydsbestel
Horlosie mal
Die tydvak val
Waarin die mens is vasgekeer
In uurwerk wat sy siel verteer.
Die lewe is 'n onbegonne taak
As sinloosheid die diepste wese raak
Om in die stryd te bly
En nie die kluts kwyt kry
Jou sinne bymekaar te hou
En aan die werklikheid te klou
Deur lewensdruk
Jou pil te sluk
Al is dit bitter ook soos gal
Jou kop te hou of jy word mal.
Geskryf deur Joffie Janse van Rensburg in 1988